لحظه صفاء

[zakaria]

لمٌا الكلام يروق
لحظه صفاء للكلام الما انجف
ترقرق في العيون
صفو النفوس
تعيدني الذكري اليك صورة

للبلد لمٌا كنٌا صغار

ايام الطفوله
و بيت الحكومه
وجناين واشجار
البيت كان جنب البحر و كان جنبنا الجروف
والمزارعيه الكرمهم شيمه لما نقطف فاكهه
لمٌا ناكل خضار
المويه الجاريه في الجداول
علب الكبري

بنات الجيران والحب العذري
الجوابات وتبادل المجلدات
لمٌا كنت بحب وبخاف من اخوك
يا بت حلتنا بنغير عليك من الغرباء
ومن كلام الناس العارفه منو البحبك اكتر
وساكته ساكت

مره شكله نسوان الجيران لمٌا كنٌا صغار
ولدك ضرب ولدي
قهوة وشحده سكر
شويه ملح في الدقيق للجاره
وتاني لمٌه العزومه جات
نغسل ايادي الناس الكبار والمدرسه سنه كم
يا ولد منو انت


اولاد الحلٌه في الدافوري
وفته فول عنذ حاجه رشيده
لمٌا قروشنا تكتر بنحضر حفله عامه
بنخلق فرح من مافي

ناس عم عوض وعم علي اصوات سكرانه باليل
واذان الصبح
تانيب ضمير بيصحي
لان الصلاه خير من النوم
ود عمك بيقول والنوم خير من الله....... ونعمه وبركه
حرام نفرط فيه النوم
واصل الدنيا برد

ضجه ماُلوفه
والماشين يبيعوا السمك في السوق
بكاسي عرب اللبن
لواري العلف والبرسيم لسوق الخضار والجذر

اليوم بيمر واليل والمساء
ساعه الغروب والطيور وين رايحه , طايره
عشوشه وود ابرق
بتكوريك وتكوريك ديوك
نباح كلب
وهدوءءءءءءءءءءءءء

ايام.....
ايم صفانا
يارب ايه الحصل مع حبابيبنا
اهلنا وحلتنا, اصحابي الزمان
مدرستنا , ميدان الكوره
الناس, الناس اين هم
ناس عمو عوض وعمي علي


البلد باحليل الوطن المنه رحلنا وبعدنا
الغربه الاجبرتنا ننسي
الغربه ليه ؟
الهجره ليه؟

ولا الظروف عذرنا
الظروف رملنا و لوحه رسمنا
ياللحزن في الشوق اليك
دمعات علي رمل
بلا اثر , اندهر و انزوي الصفاء
بلا ارتواء للخواطر
...................................
.............................
محمد عبدالله زكريا
اوسلو 16.06.2008